جرح الكرامة ****أ/ ضياء شرف
لو فاكره ريدك فوق كرامتي .....
تبقي موهومه وغبيّه
وتبقي غاراك المشاعر ....
وتبقي ما زولتي الوفيّه
كم كتير صبّرتَ قلبي ....
وقت تحِنّي عليو شويّه
إلا زايده في غرورك
وديمه تهديه الأسيّه
ماغلت ليك الأماني ...
حياتي ليك كانت هديّه
وشوقي ليك كان زي بحور ...
برضو رديتيو عليّ
كنت بحلم بيك واحة....
زاهية مخضرة وبهيّة
ومن سعادتي اذيد سعادتك ...
وأبقى ليك وتبقي ليّ
بس بعد جرح الكرامة .....
الدنيا رخصت في عينيّ
وذاد لهيب الجور جواي ....
وإنهزم صمت القضيّه
وكلمة ليك في النهاية .....
لو الدنيا تصبح بين إيديّ....
في سبيل صون الكرمة ...
تروح معاك فداء وضحيّه
والمحال أرجع أسامحك ....
ما السماح كمّلتو ياأروع بنيّه
وسيبي ريدي وتيه غرورك ....
مني ليك آخر وصيّةّ
تعليقات
إرسال تعليق