المنتهي ***محمود الجيلي

في منتهى الرقة .. زي شوكة الساعات..في التقلة و الدقة.. الحلوة أم وجنات

  في منتهى التعذيب .. زي اللهيب و النار ..ما يكون لقانا قريب..آه من بعادك حار

في منتهى الإحساس..زي الوتر في العود..تهدي النغم للناس..ست القوام و العود

في منتهى النشوة..زي التقول سكران..أنا قلبي ليك بيهوى.. يا طرفك النعسان

في منتهى الإشراق .. زي الشمس طلت..طوالي ليك مشتاق..و أشواقي ما إتبلت

في منتهى الراحة..زي وردة منديلا..يا روضة فواحة..و غرقت في نيلا

في منتهى الروعة .. زي النجوم بالليل..بتجفف الدمعة..يوم الرحيل و الويل..

في منتهى اللهفة..زي لهفتك للعيد..و الليلة يوم وقفة..ست الشعر و الجيد

في منتهى الريدة..زي بسمة العينين..بي شوق و غرويدة..قاتلني فيك جبين

في منتهى الفرحة.. زي فرحي يوم ألقاك .. لابسة الخجل طرحة..و الله إنت ملاك