محمد المهندس ـ**لون زينب***
..
بتتفتح جراحك تاني من أول
ويلقاك الزمن سالي الصُدف سكين
وفي ضهر الصبر ممهولة تتجول
في ناس بيفيضو بالتحنان
وناس في الفرحة تتسول
وتتحول من الوهم البودر فيكا
شان تصحى المشاعر تاني
قدام الهوى الطول
رسمتو زمان حلم فضفاض
ولونتو بسماحة جية احساسا
هي كانت خاطفة لونين
من فرح ممدود ومن تنهيدة انفاسا
هي كانت لافحة من لون زينب اشعارك
وخاتاك تاج علي راسا
هي سوت جيتك ضُليلة
فصّلت الغرام بحِرفة مقياسا
بقيت في الضفتين روحا وبقيت ناسا
عصافير الغرام هبدت
بقى النتّف جناحكم لو شتول الريدة
ابتسمت مشى وداسا
ورماك في الهم صبحت سجين
سماح كل الزمن نطاك
فصول ترعد اذا غيم الخريف فطاك
تقلقل سكتك نار كلمة تتواطاك
فكيف ترتاح اذا برد المشاعر دمدمك غطاك
تشد الخطوة شان باكر يكون اصبح
وباكر فصدّك وجعة وضمير بنتح
تتساق والخيال يسرح
تهودب والحصل يشرح
تهدهد والسفر يجرح
تجمّع والزمن يطرح
تذاكر والفراق ينجح
واهي الايام ترجِّع ليكا ذكرى سنين
ورحلة حب سرت أوهام
زمان في يوم من الأيام
بتتذكر؟ شكت ليك من حبيب بيغيب
ووصت نبضك العاشق يدوزن طِيب
واهدتك القلب مبصوم بلون زينب
وكان لونك عشان لونا
عشان مجنونة مسكونة
عشان الفرحة في عيونا
وعشان الدمعة بتخونا
عشان نظراتا بتخدر مشاعرك
وتبقى مسجونا
يجي يزازيك خيال كيفن
براك خليتا ترحل والحنين مشروق
براك حالف تودعا والوداع مخنوق
براكا مضيت على قصة
ابتدت فجأة انتهت بالشوق
ولونت المَشاهد عتمة
رجعَت الحزن معشوق
بتتسرب سنينك
وماك محدد وجهتك لسه
وايام العمر هدت
ملامح الهم عليك خلسة
بيحاحنك اماني الفال
اذا بتدعك عيون الليل
وباقيلك طريق وامل
بكفيك البتنتل فيو
رجاك حلمك وما اتململ
بيتأمل .. اذا لسع بتتحمل
انين ذكراها لما تنادي ابياتا
حنين الضحكة لمن تحكي نبراتا
ولمن تسلبك في لمحة وجناتا
ولمن تمشي بيك من ذاتا في ذاتا
فهل لسع بتتحمل؟
دي كانت حالة مابين المزاج والراي
وكنت براك بتديها الأمان ترحل وكنت براي
وكان جواي كلام ساكت
وناي حكاي فيلا معاي
نضاير الفينا نتلملم مساحة ونيل
اذا فاتت فأياما بتسندك حيل
وتفضل فيك ح تفضل فيك
قصيدة بنكهة الزمن المعاك بيحوم
وتفضل فيك لوحة بلون حبيب مرسوم
ويفضل فيك لون زينب لآخر يوم
تعليقات
إرسال تعليق