أصبر على الوجع البجيك

أصبر على الوجع البجيك ما ترجى في دنياك حنان
مادام هويت زول ماهو ليك وأديتو في جواك مكان
ماتشكي يوم من ظلمو ليك ماتبكي من جور الزمان
كمل دريبك ياقليب من نار شقاك أوعاك تزح ...

أنا ماني شمتان في هواك ياقلبي بس بعتب عليك
عارف طريق حبك عذاب كيفن تواصل في مشيك !!؟
تتحدى فيو بالشوق جواك ويتحدى فيك بي هجرو ليك
ضاعت كرامتك في الغرام الليله سابك وهو الربح ...

أنا اصلي عارفك ما جنيت لا يوم رضيت لي زول أذى
إلا الغرام قسمه ونصيب والريده مابتعرف جزا
لو قسمتك تجي زي هواك والله بتكون معجزه
وغابت شموس المعجزات بقى بالمصالح نصطبح ...

الفات خلاص ولى ورحل راجع براك آخر الدروس
عالج الغلط فيك ياقليب بس في المحبه أوعاك تدوس
ماتشيل جواك غل او حسد أنسى النساك للفرحه كوس
قالوا العبر في الخاتمه وقالوا السماح طبع السمح