أحمد فداسي* صــــــفآء

البت الضربت بالغلط

دقيتي بتسألي عن الاء
وأنا للأسف لا بعرفك لا بعرفا
ما حصل لي الشرف
أوصل حدود المعرفة
وما أظني بستاهل جراح
وردت فعل ما منصفة
عشقت حرفك في الكلام
واللهجة والصوت يا هنا
رديت عليك وأنا حالي زين
ما غشاني قبالك ضنى
وما غشاني من قبلك حنان
خلاني أتصرف كدا
إتبدل الحال العلي
ما شفتي كيف بعدك أنا
أنا لسه مشغول بي كلامك
وبحت الصوت الشفا
وأنا تاري بحلم بيك
يا فرحة في الزمن الشقى
ويا السمحة في عيونك خجل
زي العيونك شايفه
ويا السمحة ما تستغربي
انا زول حنيين وكدا
وهسا عايز أعرفك
سامعك هناك سامعك هنا
صوتك سكن جواي حنين
ريحني علمني الغنا
لكني خايف أزعلك
وتبقى إستحاله المعرفة
هسا كيف أنا أعرفك؟
أبدأ من وين؟ وأقول شنو؟
ولو قلتي لا أعمل شنو؟
لو قلت مشتاق مشتهيك
او قلت محتاج حاجة فيك
بحصل شنو؟
بتصدقي بتقدري ما بتزعلي؟
خايف موبايلك تقفلي
وخايفك كتير تتجاهلي
وأنا زول حنين
أرجوكي حاولي تقدري
_