انا محتاج اتعلم بعدك*** مهند الشيخ
اكتم وجعي .. واسكت وانسى ...
الا الخوف بشرق يوماتي
وظل احزانك ما بيدسا
وانا اذنبت في حق احساسك
لما سرقت زفير انفاسك
وقاصد روحك تبقى المرسى
وكل ما امد الخطوه عليكي
طريقك يبعد .. ويقول لسه
وانا محتاج بوراك اتعلم
ابقي منافق واطرش وابكم
يمكن صدفه وربنا يعلم
اقدر اعيش في الدنيا الهسه
انا محتاج انساك شان افهم
ليه الناس بتعاند روحا
وتفضل دايما دافنه جروحا
وتبني على المهدوده صروحا
وبرضو نقول الدنيا بتقسى
انا محتاج من بعدك افتش
روحي الرايحه فقدتها وين
الا بخاف جواي القاها
وانها ماتت ليها سنين
وانها ضاقت وما بتحويك
وهسه خلاص اصبحنا اتنين
وبرضو افتش تاني وراك
واني معلق في ذكراك
واسمع صوتك وباقي غناك
وباقي الشوق الكان بيتاوق
يمكن يلمح نورك خلسه
انا محتاج اتعلم بعدك
اكتم وجعي .. واسكت وانسى ...
انا سموني وراك الجاني
وقالو جريمتك زول حقاني
وكل ما اقيف في حوش اعدامك
دون اسباب تتأجل جلسه
انا محتاج يا غاليه اكونك
وما اظن اقدر اعيش من دونك
املا حروفي وانده اسمك
الا الحيل ما بكفي الهمسه
انا محتاج اتعلم بعدك
اكتم وجعي .. واسكت وانسى ..
واتعلمت اعيش في دنيا
كل مافيها بكون بصعوبه
المتعلم قبل الجاهل
والمتجنن زي العاقل
والمتدين بعد الغافل
كل درويش كايس لنوبه
تلقى الجاني بعيش متهني
وسيد الحق واقف مستني
وكم ادوار بتكون مقلوبه
وكل الناس تايهين في سكه
ونحنا نباري الخوف ف دروبا
وتبقى الوجعه مكون ثابت
وباقي حياتنا الخوف والجرسه
وتاني رجعت افتش فيكي
وارمي همومي الباقيه عليكي
وعارف انو الدنيا محطه
وماف البمرق خاتي الغلطه
وانو الدور لو جاك ما برجع
لا بتاجل لا بيتفطا ...
وما من ضل يحميك من نفسك
الا تكون احسنت الغرسه
انا محتاج اتعلم بعدك
اكتم وجعي .. واسكت ... وانسى
تعليقات
إرسال تعليق